काठमाडौँ- काठमाडौँको बालाजुमा आज बिहान मोटरसाइकल दुर्घटना हुँदा चालकको मृत्यु भएको छ । दुर्घटनामा मोटरसाइकलमा पछाडि सवार व्यक्ति घाइते भएका छन् ।
मृत्यु हुनेमा काठमाडौँको लोलाङका २२ वर्षीय सविन परियार रहेका छन् । घाइते परियारको पिपुल्स अस्पताल नयाँबजारमा उपचारको क्रममा बिहान करिब पौने ६ बजे मृत्यु भएको हो ।
घाइते भएका काठमाडौँको ईन्द्रचोकका अन्दाजी २२ वर्षकै नीरज महर्जनको सोही अस्पतालमा उपचार भइरहेको छ ।
सोह्रखुट्टेबाट बालाजु तर्फ जाँदै गरेको बागमती प्रदेश ०२–०२३ प ३७७५ नम्बरको मोटरसाइकल अनियन्त्रित भई आज बिहान ५ बजे सडक छेउको बिजुलीको पोलमा ठोकिएको प्रहरी वृत्त लैनचौरले जनाएको छ ।
