काठमाडौं । गृहमन्त्री ओमप्रकाश अर्यालले पूर्वराष्ट्रपति डा. रामवरण यादवसँग भेटवार्ता गरेका छन्। प्रधानमन्त्री सुशीला कार्कीको निर्देशनमा आगामी निर्वाचनको वातावरण बनाउन विभिन्न पक्षसँग संवाद गर्ने क्रममा गृहमन्त्री अर्यालले बुधबार डा. यादवसँग भेट गरेका हुन्।
गृहमन्त्री अर्याल ललितपुरको बागडोलस्थित पूर्वराष्ट्रपति यादवको निवास पुगेर उनको स्वास्थ्य अवस्थाबारे जानकारी लिँदै भदौ २३ र २४ गतेका घटनाले पारेको असरबारे पनि चासो व्यक्त गरेका थिए।
केहीबेरको सौहार्दपूर्ण भेटपछि दुबैबीच राजनीतिक विषयमा पनि कुराकानी भएको थियो । सो क्रममा गृहमन्त्री अर्यालले जेनजी आन्दोलनले दिएको कार्यादेशअनुसार सरकारी सेवामा प्रभावकारिता र पारदर्शिता बढाउने प्रयाससँगै निर्वाचनको तयारीका लागि सरकारले गरिरहेका कामबारे जानकारी दिए।
उनले सरकारले निर्वाचनलाई “अर्जुनदृष्टि” मानेर अघि बढिरहेको बताउँदै, पूर्वराष्ट्रपतिलाई समाजका सबै पक्षलाई निर्वाचनतर्फ उन्मुख गराउन प्रेरित गरिदिन अनुरोध गरेका थिए।
पूर्वराष्ट्रपति डा. यादवले प्रधानमन्त्री सुशीला कार्की नेतृत्वको सरकारका तर्फबाट निर्वाचनका लागि भइरहेको तयारीको प्रशंसा गर्दै निष्पक्ष र स्वच्छ चुनाव सम्भव हुने विश्वास व्यक्त गरे। उनले पूर्वप्रधानन्यायाधीशको नेतृत्वमा बनेको तटस्थ सरकारप्रति सबै पक्षले विश्वास गर्नुपर्ने धारणा राखे।
डा. यादवले विगतमा खिलराज रेग्मी नेतृत्वको सरकारले पनि प्रतिकूल परिस्थितिमा सफलतापूर्वक चुनाव सम्पन्न गरेको उदाहरण स्मरण गर्दै अहिले पनि त्यस्तै प्रतिबद्धता र एकताबाट चुनाव सम्भव हुने बताए।
