प्रधानमन्त्री सुशीला कार्कीले राहदानी वितरणको वर्तमान अवस्थाबारे परराष्ट्र मन्त्रालय र राहदानी विभागका अधिकारीहरुसँग जानकारी लिएकी छन्।
प्रधानमन्त्री कार्कीले बुधबार सिंहदरबारस्थित प्रधानमन्त्री तथा मन्त्रिपरिषद् कार्यालयमा परराष्ट्र मन्त्रालयका सचिव अमृतबहादुर राई, राहदानी विभागका महानिर्देशक तीर्थराज अर्याललगायत अधिकारीलाई बोलाएर राहदानी वितरणको स्थिति र सम्भावित चुनौतीबारे प्रत्यक्ष ब्रिफिङ लिएकी हुन्।
भेटका क्रममा प्रधानमन्त्री कार्कीले राहदानी वितरणमा देखिन सक्ने समस्या र ढिलाइबारे गम्भीर चासो व्यक्त गर्दै कुनै पनि कारणले नागरिकलाई राहदानी पाउन कठिनाइ नहोस् भनेर आवश्यक कदम चाल्न निर्देशन दिइन्।
उनले राहदानी अभाव हुने अवस्था आउन नदिन तत्काल वैकल्पिक योजनासहित अघि बढ्न मन्त्रालय र विभागका अधिकारीहरुलाई निर्देशन दिँदै सेवा प्रवाहलाई सहज, पारदर्शी र छरितो बनाउन जोड दिइन्।
प्रधानमन्त्री कार्कीले भनिन् , “राहदानी नागरिकको मौलिक आवश्यकता हो। यसमा ढिलाइ वा अव्यवस्था स्वीकार्य छैन। वैकल्पिक योजना तयार पार्दै समस्या नहुने सुनिश्चितता गर्नुपर्छ।”
बैठकमा अधिकारीहरुले राहदानी वितरण सुधारका हालका प्रयास, कच्चा सामग्री आपूर्तिको स्थिति र नयाँ प्रिन्टिङ प्रणालीका तयारीबारे प्रधानमन्त्रीलाई जानकारी गराएका थिए।
