बंगलादेशमा जारी साफ यु–२० महिला च्याम्पियनसिपको उपाधिका लागि सोमबार साँझ नेपाल र बंगलादेश आमनेसामने हुँदैछन्। प्रतियोगितामा अपराजित रहेको बंगलादेश शीर्ष स्थानमा छ भने एक हार व्यहोरेको नेपाल दोस्रो स्थानमा छ।
नेपालले लिग चरणका पाँच खेलमा ३० गोल गर्दै ४ गोल खाएको छ। बंगलादेशले २४ गोल गरे पनि गोल अन्तरमा नेपाल अगाडि छ। प्रतियोगिता गोल अन्तरमा आधारित भएकाले नेपाललाई जित्नैपर्ने दबाव छ भने बंगलादेश बराबरीमा पनि च्याम्पियन बन्न सक्छ।
नेपाली टोलीले कप्तानीमा निरन्तरता राख्न नसक्दा ३ खेलमा फरक कप्तान प्रयोग गर्यो। नियमित कप्तान बिर्सना चौधरी प्रारम्भिक खेलमा अनुपस्थित रहँदा लीला जोशी र सुजता तामाङले नेतृत्व सम्हालेका थिए।
नेपालका प्रशिक्षक यमप्रसाद गुरुङले बंगलादेशविरुद्ध अघिल्लो हारबाट सिक्दै रणनीति परिवर्तन गरिने बताएका छन्। कप्तान बिर्सना पनि टोलीको फर्वाड लाइन बलियो रहेको भन्दै मिडफिल्ड र डिफेन्स सुदृढ भएमा उपाधि सम्भव हुने बताउँछिन्।
सन् २०२२ को यु-१५ साफ उपाधिपछि नेपालले अर्को उपाधि जितेको छैन । यसपटक उपाधि हात पार्न सके नेपाली महिला फुटबलको भविष्यप्रति थप विश्वास जगाउनेछ।
प्रतिस्पर्धाको अर्काे पक्षमा, बंगलादेशका लागि सिनियर टिमबाट आएका ९ खेलाडीको अनुभव ठूलो चुनौती हुने देखिन्छ। अघिल्लो खेलमा नेपालले पहिलो हाफमै दुई गोल खाएको थियो भने दोस्रो हाफमा दुई गोल फर्काएको थियो।
यसैबीच, गोल्डेन बुटको होड पनि रोमाञ्चक बनेको छ। नेपालकी पूर्णिमा राईले अन्तर्राष्ट्रिय करिअरको पहिलो ह्याट्रिकसहित १० गोलले अग्रस्थानमा छिन् भने नेपालकी अर्की फर्वाड मिना देउवाले ७ गोल गर्दै उनलाई पछ्याई रहेकी छन्। बंगलादेशकी सागोरिकाले ४ गोल गरेकी थिइन् तर रातो कार्डका कारण ३ खेल गुमाएकी थिइन्।
उपाधिको मात्रै होइन, इज्जत र आत्मबलको पनि खेल बनेको यो भिडन्तले दक्षिण एसियाली महिला फुटबलको स्तर कति उक्लिएको छ भन्ने कुराको पनि परीक्षण गर्नेछ।
